تم إرساله دون نتيجة

بتعرف شو
يمكن موضوع الحفل كان القشة ليس إلا
لكن موقف السيارة لم استأجرتها من غفران رجعتلها ياها لابوها قبل بربع ساعة من الموعد مفللة وكلو تمام
اما انا خليتها ٥ ايام ادام الجمعية لأن مالي ضهر
يالطيف شو كسرتني بوقتها مع اني ما عملت شي إلك غير انو قلتلك مابدي مساعدتك
كلمتك لم قلتلي انو لو كنت المدير مكان انس كنت ألعتني تاني يوم ( وما كنت بعرف انو انت يلي مرشح اسمي ) كان مؤذي
لم دقيت لي لتستدل ع مكانا ولم قلتلك ليكني شفتني قلتلي مالي شايف وحدة متلك
ولا لم تركتني أدام البلدية وطلعت بالباص وكل الباصات راحو وبقيت هنيك لحالي وما قبلت ترجع تاخدني وسمعتني كلام كتير قاسي وبس خلصوا شغل اجى أحد الباصات اخدني لمنطقه كلها جبال ومافيها سكن ولا شي لصوره وانت كنت بنص البلد
ولا ولا ولا
كل يوم كان لسانك وتصرفاتك عم يكسروني أد ما حاولت بعد عنك
عدا التهديد والضغط النفسي يلي عيشتني فيه مع انو انس ما كان يحكي لي شي عن المشروع ولا حتى الخطة ولا اي معلومة وكان يطالبني بكتير مهام ويقيدني بكل حركة ويخنقني
كلامك كان مؤذي
تصرفاتك كانت مؤذية
لدرجة ماعاد شفت محمد الطيب والحنون
صرت شوفك كتلة أذى ومنبع لإذلالي واهانتي
استهلكت كامل رصيدك من المحبة يلي عندي إلك
مابعرف ليش هيك كنت عم تعمل وان قلي كذا شخص انك غيران مني ( طبعا ما بعرف من شو ) والبعض قلي انو هدفك تكسرني والبعض قال انو الشب لم بحب بنت هيك بيعمل فيها
بصراحة ما بعرف اي من كلامهم صحيح

بس بنفس الوقت ما بعرف ايمت ممكن طيب
اصعب حالة ممكن تعيشها لم عينك وعقلك يعرفو انو تصرفاته مؤذية وقلبك يدافع عنه
ما قادرة صدق أنو ممكن يطلع منك كل هاد #الشر  سواء كانت غيرة او كره او سوء تصرف او …..

ما قادرة استوعب هل هو محبة او حقد ما بعرف
بتذكر مواقف وقفت فيها معي بصير ابتسم وبنبسط
بتمر مواقفك السيئة بتوجع وبصير ابكي

اطمن حبيبي ماعاد رح كون أحسن منك بشي
ولا عاد قادرة افتح قلبي لحدى او حتى اثق فيه

برافووو محمد بيك قدرت تكسر راسي وتكسرني
انجاز ما قدر غيرك يوصله

وبحب بشرك انك ما عم تروح مني
كل يوم بشوفك بنومي وبفكر فيك وكأنه ورد او جزأ مني

مين ما شفت حتى لو صدفة بالطريق بجيب سيرتك
حتى اتخيل أحدهم كان مسافر ببيروت وبعد كذا سنة شفته بالجمعية ولم شافني صار يضحك قلتله ليش عم تضحك قلي اتذكرت صحن المايونيز وقعد يحكيلي أنو انت ما كان قصدك تدايقني ومو انت يلي خبيتها وانو انت طلبت منو يجيب متل ما انا قلتلك بس هو ما لقى حتى إني مالي متذكرة معظم التفاصيل

ولم شفت المدير بعد المشروع بفترة حكالي كيف وجعك قلبك وادايقت يوميتها بسبب يلي صار معي

ووحدة من الفريق حكت لي ع التكريم وبعض التفاصيل يلي بتغير الموقف تبعك وبتبرر لك يلي صار وقتها

وكتييير من المواقف يلي ادريت فيها لاحقا انك كنت ادامهم الملاك وانا كنت الشيطان

المؤلم بالحفل إني كنت ادام عيونك وبين اديك ونسياني وكأني لم أكن او ليس لي وجود

احيانا بقول انو الله عم يدافع عنك لأن نيتك كانت خير
وأحيانا بقول اديش كنت شخص ماكر قدرت تقنع الكل انك المظلوم مع انك كنت الظالم

المضحك انو رغم كلشي عندي أمل نرتبط
او ع الاقل تعترف انو كنت تحبني وما كنت عايشة وهم حتى لو حاليا مشاعرك تغيرت
او انك تجي وتقلي انو كل هاد منام وبتفيقني منه

ولزيدك من الشعر بيت
لم عم يتقدم لي خطابين عم قارنهم فيك بدي ياه يكون نسخة عنك

حتى موضوع انخفاض حرارة جسمي والدوخة والشهقة والرجفة قرأت عنا وبحثت لقيت اغلبهم اجتمعوا على فكرة انو هي محبة بمراحل كتير متقدمة

ما بعرف مين أنا بالنسبة إلك مع إنك قلتلي إنو إلي معزة خاصة عندك وانو كلمة بحبك يلي قلتلك ياها أثرت فيك
وغالبا لم طلعت من المعتقل انت قلت لأختك تدق لي وتخبرني
بس ماعندي يقين بأي شي

والحكي هاد حكيته لمحاولة مني اني ارتاح كرمالي ومشاني
لا لحتى تشفق علي ولا حتى تتزوجني لتكفر عن ذنوبك ويعني ولا شي من هالقصص المشلخة

بعرف انو اعتذارك الاخير كان صادق لأن لامس قلبي
وبيسعندي معرفة انو عم تتعافى مني

لكن للأسف أنا لساتني مريضة فيك
بنام بشوفك بنومي
وانا فايقة بدور عليك بين الناس يمكن إلمحك
مشتاقتلك حتى لغلاظتك لأهلك حتى لمحبتي إلك

يااااه شو في عندي كلام واسألة واستفسارات
ما بتكفيها أيام

لكن لحد هي اللحظة عم دور ع جواب لسؤالك
” أنا شو بدي منك ؟”

الجواب يلي بيخطرلي عكذا منحى
لكن اهمها
انو بدي منك الحقيقة مهما كان تمنها او قساوتها
حقيقة نواياك ومشاعرك والشي يلي انت هلأ عم تمر فيه
ارهقتني الأكاذيب الناتجة عن تناقضات المواقف والأقوال
احساسي وقلبي بوادي وعقلي وفكري بوادي

أكيد رح انطر منك رد او رد فعل
رغم معرفتي انو إلك حرية الاختيار

#مودتي