احصائية

 

ذكرة وفكرة

في خاطرة مرت ع بالي لم شفت الإستاذ هيثم دمشقي البارح بعد سفرة دامت شهر حسيت إنو بالفعل إشتقت

لأبي …

ولم فتنا سلمنا عليه صرت أطلع ع كل متطوع ومتطوعة وأتذكر إيييييييييييه إيام كتير حلوة وأتذكر نهفات وخواطر وضحكات مرت معنا …
الأيام يلي قضيتها معكم كانت أجمل إيام حياتي وهيَّ تاريخ قضيناه سوا ..

أتعلمت معكم العمل تحت التلج بالتعتيل ..

أتعلمت الفعي واللعب بعز الشوب برمضان بأنشطة غالية فرحات وسعد الله ونوس
يلي كنا نقول عليها ” أسعد الله أنوس ” ومازال هالفعي مستمر لهلأ رغم طول نهار الصيام
والشوب والعطش إلا أننا كلنا نازلين وعم نبذل كل طاقتنا ونحتسب هالأجر عند الله ..

أتعلمت العمل بعز البرد بالمعرض لك صحي والله المعرض لحاله قصته قصة ههههههه ومقالبه لا تنسى كمان بتذكر كيف عمرنا البيت وكيف قصينا كورنيش وكيف كوينا زقزيق على شكل حروف
ولا الشمعة والأداحة يلي بكل الجمعية ما حدى معه أداحة لأنو ما حدى بدخن لا صبايا ولا شباب وكيف غنينا للأستاذ هيثم دمشقي لم طلع يشوف الشغل ..

أتذكرت العزيمة يلي عملها الإستاذ هيثم دمشقي وخاصة لم كنت بوقتها بالبحر ودقيتولي
لتحاكوني إنو ما نسيتوني وسلمتوا علي وكأني معكم لأنو بالفعل من وقتها قلبي تركته عندكم ويستمر ..
إي بالفعل هيك بحس حالي بيناتكم وحدة منكم وفيكم للبعض أخته الصغيرة وللبعض بنته
وللبعض أخت كبيرة وللبعض رفيقة ..

مجرد شوفتكم بتعنيلي كتير بتخليني أنبسط وأفرح بسلم عليكم بقوة يمكن لأنو بكون
مشتاقتلكم بتمنى لم عانقكن كون عم احمل عنكم كتف أو أذرع محبة أمل بظل هالظروف
القاسية يلي عم نتعرضلها بهالبلد ..

بحبكم لدرجة مو قادرة بدّي أي شي تاني عنكم ..
كل فترة والتانية عم تجينا متطوعة أو متطوع جديد لا ما رح قول متطوعين رح قول

أهل جدد وأحباب وأصحاب جدد ..

ما كنت أتخيل حالي ولا لمرة إني حب ناس و مكان ومجتمع لهالدرجة ..
لم شوف حدى فيكم مهموم بدعيله بسري لأنو هاد الشي الوحيد يلي بقدر قدملكن ياه ..
بعرف إنو الضغوطات صارت علينا تقيلة وعم تكسر ضهرنا وتهدنا هد من جوى قبل برا
بس بإذن الله رح نقوى ببعضنا البعض ..
رح تمر هالفترة علينا وتنتهي هالأحداث ونحنا إيد وحدة وقلب واحد ..
صح إني مالي ملاك وعندي كتير اخطاء البعض ما بيتحملها ومع هيك عم تتحملوها كرمال الهدف الكبير والغاية لكبيرة يلي هي إنو: ” نتعاون ونتعاضد لنرسم بسمة ع وجنة طفل ولندعم أم فقد غالي ولندعم أب فقد العون المادي .. ”
هدفنا أكبر من سفاسف الأمور ومتل ما إنو أصبيعنا مو متل بعضها فطبيعي يكون كل واحد فينا شخصية وكل واحد فينا طبع ..
بس هاد الإختلاف بالشخصيات لازم نستفيد منه ليولد روح التكامل والود والتناغم بيناتنا ..
يلي بينقصني بتكملوه ويلي بينقصكم بكمله إي نحنا كلنا منكمل بعض متل:
لوحة بظل كلنا سوا عم نشكل لوحة وكل واحد فينا بحدد هاللوحة كيف تكون وبتمنى تكون أحلى لوحة يلي هية لوحة ” العمل بروح الفريق ” .
وإختلافاتنا لا تفسد للودّ قضية متل ما بقولوا (المصرين بالبطن بتتخانق ) …
ولأنو من رحم الألم يولد الإبداع وبسبب الألم يلي عم نمر فيه في ظل الأوضاع الراهنة وما يمر به عالمنا العربي من أحداث وأزمات، نحتاج في هذا الوقت تحديداً الى من يساعدنا في تخطي هذه الازمات والمضي قدماً في حياتنا بسعادة .
وتحقيق أحلامنا وأهدافنا وإني ليقينة أن الله خير معين ومن إعانته لنا أن أكرمني بكم .
==============================
يمكن الضغوطات عم تطحن كل واحد فينا طحن بس بدي نتفق إنو نكون عون لبعضنا البعض
مهما منعتنا الظروف من أنو نعين بعضنا لازم ما نستسلم , فمهما كانت المخاطر رح نحصل
على المعونة الربانية بطريقة نُدهش لها …
===============================
معاً نحو عالم مشرق … مليء بالحُب , التعاون , الأمل .
===============================
{إِنَّمَا الْمُؤْمِنُونَ إِخْوَةٌ فَأَصْلِحُوا بَيْنَ أَخَوَيْكُمْ وَاتَّقُوا اللَّهَ لَعَلَّكُمْ تُرْحَمُونَ }الحجرات10
============ مودتي ==============
اللهم ألف بين قلوبنا بحق هذه الأيام الفضيلة
روان
https://www.facebook.com/photo.php?fbid=193877094106169&set=a.101482173345662.3481.100004516381510&type=1&relevant_count=1